द सौर्य मिथिला समाचारदाता
जनकपुरधाम,जेठ १९ गते ।
नेपाल सहित पूरै विश्व कोरोना महामारीको संक्रमणबाट उन्मुक्ति पाउने कोशिशमा लागेको छ । नेपालमा पछिल्लो समय कोरोना संक्रमणको दर ससमेत ह्वात्तै बढेको छ ।
पूरै विश्व कोरोना संक्रमणबाट आक्रान्त रहेको समयमा प्रदेश दुई सरकार कोरोना संक्रमणलाई नियन्त्रणको दिशामा लाग्नुको साटो भ्रष्टाचारमा चुल्र्लुम डुबेको पाइएको छ । प्रदेश २ सरकारले कोरोनासँग सम्बन्धित स्वास्थ्य सामग्री खरिदको नाममा करोडौ रुपैयाँ भ्रष्टाचार गरेको तथ्य बाहिरिएको हो ।
कोरोनाको रोकथामका लागि उपचारमा प्रयोग हुने स्वास्थ्य सामग्री खरीदमा सामाजिक विकास मन्त्रालय अन्तर्गत रहेको प्रदेश स्वास्थ्य आपूर्ति व्यवस्थापन केन्द्र मार्फत करोडौं रुपैयाँ भ्रष्टाचार भएको हो ।
पीपीई सेट, एन–९५ मास्क, थर्मो्मिटर, सेनिटाइजर र सर्जिकल मास्क खरीदको नाममा बजार मूल्य भन्दा ४५ देखि २ सय प्रतिशत बढी महंगो मुल्यमा थोक खरीद गरी भ्रष्टाचार गरेको कुरा मन्त्रालयकै वेवसाइटमा जेठ १४ गते सार्वजनिक गरिएको कोभिड १९ मालसमान खरीद विवरणमा उल्लेख रहेको देखिएको छ ।
प्रदेश स्वास्थ्य आपूर्ति व्यवस्थापन केन्द्रले बजारमा खुद्रामा पाइने ३ हजार ५ सय रुपैयाँ पर्ने पीपीई सेट ६ हजार ५ सयमा, ५ हजार पर्ने आईआर थर्मो्मिटर ८ हजारमा, ३ सयसम्म पर्ने एन–९५ मास्क ५ सयमा, ७ रुपैयाँ पर्ने सर्जिकल मास्क १६ रुपैयाँमा र १ सयदेखि बढीमा साढे दुई सयसम्म उपलब्ध हुने सेनिटाइजर ५ सय रुपैयाँको दरले खरिद गरेको छ ।
सामाजिक विकास मन्त्रालयको वेवसाइटमा राखिएको विवरणमा प्रदेश स्वास्थ्य आपूर्ति व्यवस्थापन केन्द्रले काठमाडौँस्थित मेडी सोलुसन इन्टरनेशनल प्रा.लि.बाट ६ हजार ५ सयको दरले साढे ६ हजार पीपीई सेट ४ करोड २२ लाख ५० हजारमा, आदित्य इन्टरनेशनल जनकपुरबाट ८ हजारको दरले ४ सय थान आईआर थर्मो्मिटर ३२ लाखमा, राइन सप्लायर्स जनकपुरबाट एन–९५ मास्क ५ सयको दरले २१ सय थान १० लाख ५ हजारमा, जेके आरएस इम्पोर्ट एण्ड एक्सपोर्ट प्रा.लि. काठमाडौबाट १६ रुपैयाँको दरले ९० हजार पीस सर्जिकल मास्क १४ लाख ४० हजारमा र दुर्गा ट्रेड लिङ्क जनकपुरबाट ५ सय ९९ रुपैयाँको दरले १ हजार थान सेनिटाइजर ५ लाखमा गरि जम्मा ४ करोड ८४ लाख ९४ हजारको सामान खरीद गरेको छ ।
यता,मेडि सोलुसन इन्टरनेशलन प्रा.लि.को प्रतिनिधिसँग दररेट सम्बन्धि जानकारी लिन खोज्दा आफू कहाँ पीपीई सेटको मुल्य १ हजार २ सयदेखि बढीमा ३ हजार ५ सयसम्मको रहेको बताए । उनका अनुसार यो दररेट भन्दा महँगो हाल नेपालको कुनैपनि बजारमा पीपीई उपलब्ध छैन् । सोही पीपीई सेटको मुल्य जनकपुर बजारमा बढीमा ४ हजार ५ सय रुपैयाँसम्म पर्ने गरेको छ ।
यसरी हेर्ने हो भने खरिद गरिएको सामग्री मध्ये खुद्रा दररेटकै हिसाब गर्दा पीपीई र थमोर्््मिटरको प्रति सेटमा ३ हजार, एन–९५ मास्कमा २ सय, सर्जिकल मास्कमा ९ रुपैयाँ र सेनिटाइजरमा २ सय ५० रुपैयाँ महंगो मुल्य निर्धारण गरिएको छ ।
प्रदेश स्वास्थ्य आपूर्ति व्यवस्थापन केन्द्रले खरिद गरेको ४ करोड ८४ लाख ९४ हजारको सामान मध्ये पीपीई सेटमा १ करोड ९५ लाख, थर्मो्मिटरमा १२ लाख, एन–९५ मास्कमा ४ लाख २० हजार, सर्जिकल मास्कमा ८ लाख १० हजार र सेनिटाइजरमा २ लाख ५० हजार गरि आपसी मिलेमतोमा २ करोड २१ लाख ८० हजार रुपैयाँ भ्रष्टाचार गरेको प्रष्ट देखिन्छ ।
यस सम्बन्धमा प्रदेश स्वास्थ्य आपूर्ति व्यवस्थापन केन्द्रका जनस्वास्थ्य प्रशासक श्रवण कुमार नायकले आफुहरुले प्रक्रिया पुर्याएर प्रतिष्पर्धाको आधारमा स्वास्थ्य सामग्री खरीद गरेको दाबी गरेका छन् ।
उनले भने,‘बजारमा धेरै क्वालिटीका सामानहरु उपलब्ध छन् तर हामीले डब्लूएचओले निर्धारण गरेको मापदण्ड अनुसारका सामानहरु किनेका छौं । त्यसैले मुल्य बढि तिर्नुपरेको छ ।’
सामानको क्वालिटी, भ्याट र ढुवानी लगायतका खर्च समेत जोडेर हेर्दा यस प्रदेशले बागमती, गण्डकी र प्रदेश नम्बर–१ ले खरिद गरेको दरभन्दा पनि कम मुल्यमा खरिद गरेको छ ।
यो विषयमा टिप्पणी गर्नुहोस् !