विन्देश्वर ठाकुर
मैले चिन्ने एउटा नेता छ-
जसको बार्दलीमा भ्रष्टाचार खस्छ
धुकुटीमा बस्छ
अंगेनामा मगमगाउछ अनि
पल्लो घरसम्म सुगन्ध छार्छ।
मैले चिन्ने अर्को नेता छ –
जसको केशमा भ्रष्टाचार जन्मन्छ
ड्रेसमा जुर्मुराउछ अनि
अनुहारबाट पारदर्शी रुपमा
घडी घडी झल्कन्छ।
मैले चिन्ने एउटा अर्को नेता छ-
जसले आफ्नो मुख भ्रष्टाचारले धुन्छ
आफ्नो कान भ्रष्टाचारले सुन्छ
बेस्सरी नुहाउन भ्रष्टाचार प्रयोग गर्छ अनि
भ्रष्टाचार मात्रै खाएर हुर्कन्छ ।
मैले चिन्ने अर्को नेता पनि छ –
जो नोटमा भोट किन्छ
आफन्तलाई मात्र चिन्छ
निर्दोषलाई दण्ड फैसला गर्छ अनि
जनतालाई दुख मात्र दिन्छ ।
मैले चिन्ने यी यस्ता नेता पनि छ –
जसले आफ्नै गुट बनाउँछ
इसारामा सबलाई नचाउँछ
कानुन हातमा लिन्छ अनि
आफै लुटपाट मचाउछ ।
मैले चिन्ने यी विशिष्ट नेता पनि छ –
जो दिनमा भजन गाउँछ
रातमा देश बनाउँछ
मागी मागी ल्याउँछ अनि
सबलाई बेब्कुफ बनाउँछ !
हो मैले चिन्ने मेरा देशका
यिनै- यस्तै नेताहरु छन् जसले
गाइरहेछन् देशभक्तिका गीत
हाकिरहेछन् विश्वस्तरको देश अनि
गरिरहेछन् निस्स्वार्थ सेवा !
यो विषयमा टिप्पणी गर्नुहोस् !