द सौर्य मिथिला समाचारदाता
जनकपुरधाम, जेठ ६ ।
जनकपुरधामका कोरोना संक्रमित पत्रकार तथा पुस्तक व्यवसायीका परिवारको कोरोना रिपोर्ट नेगेटिभ आएको हो । गत मंगलबार स्वास्थ्य तथा जनसंख्या मन्त्रालयले धनुषाका ४० वर्षीय पुरुष र महोत्तरीका ३५ वर्षीय पुरुषमा कोरोना संक्रमण रहेको पुष्टि गरेको थियो ।
धनुषाका ४० वर्षीय पुरुष जनकपुरधाममा रही पत्रकारीता गर्दै आएका हुन भने महोत्तरी स्थाई ठेगाना भएपनि जनकपुरधाममा पुस्तक पसल सञ्चालन गरेका दुवै जनामा कोरोना संक्रमण पुष्टि भएको थियो ।
दुवै जनामा कोरोना संक्रमण पुष्टि भएपछि तिनीहरुका परिवारजनलाई क्वारेन्टाइनमा राखेर कोरोना परिक्षणको लागि स्वाब संकलन गरिएको थियो ।
४० वर्षीय पत्रकारका परिवारका ६ जना र पुस्तक व्यवसायीका परिवारका ३ जना गरी ९ जनाको कोरोना रिपोर्ट नेगेटिभ आएको नेपाल पत्रकार महासंघ धनुषाका अध्यक्ष अनिल मिश्रले जानकारी दिएका छन् ।
उनले भने, ‘संक्रमित भनिएका पत्रकार र पुस्तक व्यवसायीको परिवारका सबै सदस्यको पिसिआर रिपोर्ट नेगेटिभ आएको छ ।’ त्यस्तै संक्रमितहरुको सम्पर्कमा आएकाहरुको सोमबार कोरोना परिक्षणको लागि स्वाब संकलन गरिएकोले रिपोर्ट आउन बाँकी रहेको छ ।
यो विषयमा टिप्पणी गर्नुहोस् !