द सोर्य मिथिला समाचारदाता
जनकपुरधाम, जेठ १ ।
प्रदेश २ मा सबैभन्दा बढि व्यक्तिमा कोरोना संक्रमण रहेको पुष्टि भएपछि स्वाब संकलन गर्न काठमाडौँबाट विशेष टोली आएको हो । प्रदेश २ मा कुल ९८ जनामा कोरोना संक्रमण पुष्टि भएपछि यस प्रदेशमा स्वाब संकलन गर्ने काममा तिव्रता दिन विशेष टोली आएको हो ।
आज नियमित मिडिया ब्रिफिंगको क्रममा सामाजिक विकास मन्त्रालय प्रदेश २ का सचिव डा. रामप्रसाद घिमिरेले यहाँ आएको विशेष टोलीले प्रदेश २ को आठ वटै जिल्लामा संभावित संक्रमितहरुको स्वाब संकलन गर्ने जानकारी दिएका छन् ।
प्रदेश २ मा ८ जिल्ला रहेकोमा एउटा जिल्ला बाहेक सबै जिल्लामा कोरोना संक्रमित फेला परेका छन् । प्रदेश २ को पर्सा जिल्ला कोरोनाबाट सबैभन्दा बढी प्रभावित रहेको छ भने रौतहट, बारा, सर्लाही, महोत्तरी, धनुषा र सप्तरीमा कोरोना संक्रमित फेला परेका छन् । अहिले सिरहा जिल्लामा कुनै कोरोना संक्रमित फेला परेका छैनन् ।प्रदेश २ मा पछिल्लो २४ घण्टामा ३० जना नयाँ संक्रमित फेला परेको हो ।
पर्सा जिल्लामा कोरो संक्रमण सबैभन्दा बढि बढेपछि वैशाख ३० र ३१ गते फेला परेका ६० जनालाई आधार मानी ३ सय ७० जनाको कन्ट्राक्ट ट्रेसिंग गरिएको र तिनीहरुको स्वाब संकलन गर्ने काम समेत सुरु भएको सचिव डा. घिमिरेले जानकारी दिएका छन् ।
त्यस्तै सर्लाहीमा फेला परेका संक्रमितको सम्पर्कमा आएका ३० जनाको पहिचान गरि स्वाब संकलन गरेर तिनीहरुलाई क्वारेन्टाइनमा राखिएको हो ।प्रदेश २ मा अहिले सम्ममा कुल ४ हजार ६ सय जनाको स्वाब संकलन गरिएकोमा ३ हजार ७ सय २९ को नेगेटिभ र ९८ जनाको रिपोर्ट पोजेटिभ आएको हो त्यस्तै बाँकीको रिपोर्ट आउन बाँकी रहेको सचिव डा. घिमिरेले जानकारी दिए । त्यस्तै ५ हजार ५ सय १० जनाको आरडिटि परिक्षण गरिएकोमा १० जनाको रिपोर्ट पोजेटिभ र ५ हजार ५ सय जनाको नेगेटिभ आएको हो ।
प्रदेश २ को ८ जिल्लामा ४ हजार २ सय ५१ बेड संख्या क्षमता भएको १८१ वटा क्वारेन्टाइन रहेकोमा अहिले १ हजार ९ सय ८ जना क्वारेन्टाइनमा रहेका छन् । होम क्वारेन्टाइनमा भने ४ हजार ७ सय १४ जना रहेका छन् । ३ सय ९८ बेड क्षमता भएको आइसोलेशनमा अहिले १ सय ५ जना रहेका छन् ।
यो विषयमा टिप्पणी गर्नुहोस् !