द सौर्य मिथिला समाचारदाता
जनकपुरधाम, वैशाख २८ ।
कोरोना संक्रमण रोकथाम तथा नियन्त्रणका लागि सरकारले घोषणा गरेको ४८ औँ दिनमा सरकारले लकडाउनलाई केहि खुकुलो बनाउदैँ गईरहेको समयमा प्रहरीले व्यवहार नरम बनाउनुको साटो झन् अमानवीय व्यवहार गर्दै आएको देखिएको छ । लामो समयको लकडाउनले प्रहरीमा निकै तनाव देखिएको छ ।
घरमै घुसेर कुटपिट देखि घर अगाडी बसेको स्थानीयलाई समेत मानवअधिकारको खयाल नै नगरी प्रहरीले कुटपिट गरेको आरोप लागि रहेको छ । दिउसो समयमा एक महिला घरमै स्नान गरिरहेको बेला प्रहरीको एक टोली घरमा प्रवेश गरी बसिरहेका परिवारजनलाई गाली गलौँज गरी कुटपिट गर्दै गएपछि ति महिला निकै डराएकी छिन् ।
जनकपुरधाम वडा नम्बर ६ स्थित पेठियाबजार बस्ने ५५ वर्षिय गीता देवी ठाकुर दिउसो घरमै स्नान गरिरहेको बेला प्रहरीहरु एकाएक प्रवेश गरेपछि उनी डराउदैँ किन घर भित्र आउनु भएको सोध्दा झपार्दै घरभित्र बसिरहेका परिवारजनलाई कुटपिट गरेको बताइन् ।
पीडित गीताले भनिन- चापाकलमा म नुहाउदैँ थिए, घरको मुल ढोका ढक्ढकाउदैँ एकाएक प्रहरी प्रवेश गरेपछि आफु नुहाइरहेको समयमा घरमा यसरी किन प्रवेश गरेको भन्दै प्रश्न गर्दा आफुलाई हकार्दै घर भित्र पसेको र घरमा रहेको बहिनी ज्वाईलाई एकाएक कुटपिट गरेको प्रति दुःख व्यक्त गरिन् । त्यस्तै घर अगाडी बसिरहेका स्थानीय ४५ वर्षिय दिलिप कुमार साहलाई समेत प्रहरीले अनाहकमा कुटपीट गरेको छ ।
केहि वर्ष अघि एक दुर्घटनामा खुट्टा भाचिएपछि खुट्टामा स्टील राखिएको छ । र उनी घरमै आराम गरिरहेका छन् । उनी बेलुका तर्फ घर अगाडी बसिरहेका बेला प्रहरीको एक टोलीले जथाभावी कुटपीट गर्दै शरिरको विभिन्न भागमा लाठीले कुटेको दाग बसेको छ ।
पीडित साहले भने– प्रहरीलाई आफुले अनुरोध गर्दै खुट्टा भाचेर रेस्टमा बसेको छु भन्दा भन्दै पनि एक्कासी कुटपिट गरेर जिउ र तिघ्रामा समेत दाग बसेको छ ।
स्थानीय महावीर यूवा कमिटीका समेत निवर्तमान उपाध्यक्ष रहेको दिलिपले तत्कालै प्रहरी उपरिक्षक रमेश कुमार बस्नेतलाई आफु सहितकालाई प्रहरीले तथानाम भन्दै कुटपिट गरेको जानकारी दिए ।
यो विषयमा टिप्पणी गर्नुहोस् !