एजेन्सी, वैशाख २८ ।
विश्वभर कोरोना भाइरसबाट संक्रमित हुनेको संख्या ४० लाख नाघेको छ ।जोन्स हपकिन्स विश्वविद्यालयको आधिकारिक तथ्यांक अनुसार आइतबार बिहानसम्म संक्रमित संख्या ४० लाख २३ हजार २ सय १८ पुगेको छ ।
त्यसैगरी मृतक संख्या २ लाख ७९ हजार नाघेको छ। पछिल्लो विश्व विवरण अनुसार आइतबारसम्म २ लाख ७९ हजार ३ सय ३ जनाको कोरोनाका कारण ज्यान गइसकेको छ ।
कोरोनाबाट सबैभन्दा बढी प्रभावित राष्ट्र अमेरिका बनेको छ। एक चौथाई बढि संक्रमित अमेरिकाबाट छन् भने मृतकमध्ये एक तिहाइ बढी पनि यहीबाट छन् ।थुप्रै राष्ट्रहरुमा कोरोनाको परीक्षणदर निकै कम भएकाले वास्तविक संख्या अझ धेरै हुनसक्ने विज्ञहरूले बताउँदै आएका छन्।
यस्तै कुल संक्रमितमध्ये हालसम्म १३ लाख ७० हजार ३ सय ७५ जना निको भएका छन्।केही देशमा कोरोना संक्रमणका मामिला बढ्दै गएको देखिएपनि केही मुलुकमा भने विस्तारै घट्न थालेको छ। ।
स्पेन लगायत केही राष्ट्रहरूमा दैनिक मृत्युदर संख्या पनि लगातार घट्दै गइरहेको तथ्यांकले देखाएको छ । प्रभाव कम हुँदै गएको देखिएपनि लकडाउनलाई सहज बनाउँदा संक्रमणको ’दोस्रो लहर’ फैलिन सक्ने चिन्ता पनि बढेको छ ।
कोरोनाका कारण अतिप्रभावित युरोपेली मुलुक इटालीले पनि अघिल्लो हप्ताबाट लकडाउनका केही प्रतिबन्धहरु सहज बनाउन थालिसकेको छ। इटालीमा एकपटक महामारीको विश्वव्यापी केन्द्र बनेको थियो ।
त्यस्तै फ्रान्समा पनि एक महिना भन्दा बढी समयपछि कोरोना भाइरस संक्रमणका कारण हुने दैनिकी मृत्यु संख्या सबैभन्दा कम रेकर्ड गरेको छ। पछिल्लो २४ घण्टामा त्यहाँ जम्मा ८० जनाको संक्रमणका कारण मृत्यु भएको छ ।
उसको छिमेकी राष्ट्र स्पेन सरकारले लकडाउनका प्रतिबन्धहरु कम गर्न थालेसगै फ्रान्सले पनि सोमबारदेखि प्रतिबन्धहरु केही सहज पार्ने तयारी गरेको छ ।
यसैबीच विपक्षी दलहरूको आह्वानको बाबजुद पनि दक्षिण अफ्रिका जस्ता देशहरूमा भने लकडाउन जारी छ।यस्तै ब्राजिलमा कोरोना संक्रमितको संख्या अन्य ल्याटिन अमेरिकी देशभन्दा बढी देखिएको छ।
यो विषयमा टिप्पणी गर्नुहोस् !