द सौर्य मिथिला समाचारदाता
जनकपुरधाम, वैशाख २६ ।
प्रदेश दुई कोरोना संक्रमण बढ्न सक्ने सम्भाव्यताको हिसाबले सैभन्दा जोखियुक्त प्रदेशमा पर्छ । भारतसंगको खुल्ला सीमाका कारण प्रदेश दुईको आठ वटै जिल्लामा कोरोना संक्रमण फैलिन सक्ने सम्भाव्यतालाई नकार्न नसकिने विशेषज्ञहरुको भनाई छ ।
यस अवस्थामा समेत प्रदेश दुईमा कोेरोना परिक्षणका लागि आवश्यक पर्ने किटको चरम अभाव भएको छ । प्रदेश दुईमा वर्तमानमा जम्मा कोरोना भाइरस परिक्षण गर्ने भिटिएम किट ५ सय थान मात्रै मौज्दात रहेको सामाजिक विकास मन्त्रालयको आपूर्ति महाशाखाले जनाएको छ ।
अहिले भिटिएम किट अभावका कारण कोरोना परीक्षण नै रोकिएको त छैन्,तर शंकास्पद बिरामी आएमा कोरोना परिक्षण गर्नका लागि किट अभाव हुने आपूर्ति महाशाखाका निर्देशक डाक्टर प्रमोद कुमार यादवले बताए ।
भारतबाट आएका र वैदेशिक रोजगारमा गएका अथवा विभिन्न जिल्लाबाट आएकाहरुमा केही लक्षण देखिएमा वा कोरोना आशंका भएमा कोरोना परिक्षण गर्ने भरपर्दो विधि (भिटिएम) पिसिआर किट नै हो । पिसिआर किट ५ सय थान मौज्दात मात्रै बाँकी हुँदा परिक्षणमा समस्या हुने सम्भावना बढेको छ ।
किटको अभाव हुँदा कतिपय स्थानका क्वारेन्टाइनमा १४ दिनभन्दा बढी बसिसकेकाहरुको समेत स्वाब परीक्षण हुन नसकेको डा.यादवले बताए । उनले भने ‘क्वारेण्टाइनमा राख्ने समय कतिपयको पुगि सकेको छ, तैपनि परिक्षण गर्न सकेका छैनौँ ।’
संघीय सरकारले प्रदेश दुईको लागि गत चैत १२ गते ४० थान, वैशाख १३ र २३ गते १÷१ हजार थान गरी जम्मा २ हजार ४० थान भीटीएम किट पठाएको थियो । वैशाख २३ पछि संघीय सरकारले प्रदेश दुईमा भीटीएम किट पठाएको छैन् आफूर्ति शाखाले जनाएको छ ।
प्रदेश दुईको लागि मात्रै कम्तीमा २५ हजार भीटीएम किटको आवश्यक्ता रहेको निर्देशक यादवले बताए । यसकालागि प्रदेश सरकारले प्रकृया अगाडी बढाई सकिएको छ उनले जानकारी दिए ।
आरडीटी किटको झनै अभाव
प्रदेश दुईमा भिटिएम किटको अभाव रहेको समयमा आरडिटी किटको झनै अभाव रहेको छ । प्रदेश दुईमा अहिले आरडीटी किट समेत जम्मा १ सय थान मात्रै मौज्दात बाँकी रहेको छ । संघिय सरकारले प्रदेश दुईमा चैत २९ गते ५ हजार थान, बैशाख ५ गते २ हजार थान र बैशाख २३ गते १ हजार थान आरडीटी किट पठाएको थियो ।
प्रदेश दुईको ८ वटै जिल्लामा अहिलेसम्म ५ हजार ३ सय ५३ जनाको आरडीटी परीक्षण गरिएको छ । त्यसमध्ये १० जनाको रिजल्ट पोजेटिभ आएको छ भने ५ हजार ३ सय ४३ जनाको रिपोर्ट नेगेटिभ देखिएको छ ।
कोरोनाभाइरस संक्रमणको पहिचानका लागि गरिएको आरडीटी टेष्ट अन्तर्गत सप्तरी जिल्लामा अहिलेसम्म १ हजार ४९ जना,सिरहामा ३ सय ४७ जना,सर्लाहीमा १ सय ७० जना,धनुषामा ४ सय ९५,महोत्तरीमा १ सय ७८ जना,रौतहटमा ५ सय ६२,बारामा १ सय ५४ जना र पर्सामा २ हजार ३ सय ९८ जनाको आरडीटी परीक्षण गरिएको छ ।
यो विषयमा टिप्पणी गर्नुहोस् !