सालीसंगको अवैध सम्बन्ध बचाउन श्रीमतीको हत्या, ४ दिन पछी शव फेला

द सौर्य मिथिला समाचारदाता
जनकपुरधाम, वैशाख २२ ।

धनुषामा एक पुरुषले सालीसंगको अवैध प्रेम सम्बन्ध बचाउनका लागि आफ्नै श्रीमतीको नाटकीय शैलीमा हत्या गरेका छन् । धनुषाको मिथिला नगरपालिका वडा नम्बर ९ लालभिट्टीका २८ वर्षिय हरि चौहानले आफ्नो कान्छी सालीसँगको अवैध प्रेम सम्बन्धलाई बचाउनका लागि श्रीमतीको हत्या गरेका हुन् ।

उनले २५ वर्षिया पत्नी विणा चौहान लामाको हत्या गरेको प्रहरीले जनाएको छ ।श्रीमती विणालाई श्रीमान हरिको आफ्नै बहिनीसंग अवैध सम्बन्ध रहेको थाहा पाएपछि उनको सातो गयो । त्यसपछि उनले श्रीमानलाई ‘तिम्रो अवैध सम्बन्ध मेरो बहिनीसँग छ, तिमी जहिले नि ढिलोगरि घर आउँछौ ’ भन्ने गर्थिन् ।

अन्त्यमा हरिले सालीसंग मिलेर विणाको हत्या गर्ने योजना बनाएको प्रहरीको प्रारम्भिक अनुसन्धानले देखाएको छ ।

हरिले विणालाई बाली काट्ने बहानामा लालगढ सामुदायिक वनस्थित मगर्नी खोलामा लगेर उसैले लगाएको शलले घाँटी बेरेर हत्या गरेको बताइएको छ । श्रीमतीको हत्यापछि सोही जंगलमा शव गाडेका थिए । सो शवलाई ४ दिनपछि उत्खन्न गरेर निकालिएको छ ।

गत वैशाख १८ गते बिहीबार साँझ करिव साढे पाँच बजेको समयमा विणालाई बाली काट्न जंगल जाउँ भन्दै त्यहाँ लगेर घाँटीमा लगाएको शलले बेरेर उसको हत्या गरि शवलाई जंगलमै गाडेको चौहानले प्रहरी समक्ष बयान दिएका छन् ।

चौहानले सालीसंग मिलेर हत्याको पूर्व योजना बनाएका थिए । उनले हत्या गर्नु अघि पहिले नै जंगलमा खाल खनेर तयार राखेको ढल्केवर इलाका प्रहरी कार्यालयको ईन्चार्ज प्रहरी निरीक्षक तिर्थ कार्कीले जानकारी दिए । उनले भने,’विणालाई जंगलमा लगेर हत्या गरि खाडलमा गाडिएछ । घटना योजनाबद्ध तरिकाले भएको देखिन्छ ।’

पेशाले गाडी चालक रहेको चौहान बैशाख १९ गते बिहान पत्नी हराएको भन्दै प्रहरी समक्ष मौखिक जानकारी समेत गराएका थिए ।

५ वर्ष अगाडी विणासँग अन्तरजातिय विबाह गरेकाले बुवाआमाले घरमा बस्न नदिएपछि ससुरालीको छेउमै आफ्नो घर बनाएर बस्दै आएका चौहान गत एक वर्षदेखि आफ्नो कान्छी साली गंगा लामासँग अवैध समेत राख्दै आएका थिए विणालाई यो सब थाहा भएपछि विणाको हत्या गरिएको देखिन्छ प्रहरी निरीक्षक कार्कीले भने,‘अन्त्यमा श्रीमानले योजनाबद्ध तरिकाले श्रीमतीको हत्या गरि आफ्नो साथी गोपाल श्रेष्ठलाई फोन गरि घटनाको सम्बन्धमा जानकारी दिएका थिए ।’

खाडलमा पुरिएको शवलाई प्रहरी निरीक्षक कार्कीको नेतृत्वमा गएको प्रहरी टोलीले आईतबार साँझ उत्खनन् गरी निकालेको छ । सडेको अवस्थामा भेटिएको शवलाई पोष्टमार्टमका लागि प्रादेशिक अस्पताल जनकपुरमा पठाइएको प्रहरी निरीक्षक कार्कीले बताए ।

हत्या अभियोगमा हरि चौहानलाई पक्राउ गरि म्याद थपका लागि जिल्ला अदालतमा पठाइएको छ । घटनाको थप अनुसन्धान भईरहेको प्रहरीले जानकारी दिएको छ । मृतक विणाको ४ वर्षकी एक छोरी र साढे दुई वर्षका एक छोरा छन् ।