द सौर्य मिथिला समाचारदाता
जनकपुरधाम, वैशाख २१ ।
सिमेन्टको कालोबजारी गर्ने दुई जना पक्राउ परेका छन् । धनुषा जिल्लाको जनकपुरधाममा निर्धारीत मुल्यभन्दा बढीमा सिमेन्ट बेच्ने दुई जनालाई प्रहरीले नियन्त्रणमा लिएको हो ।
आइतवार जिल्ला प्रहरी कार्यालय धनुषाबाट खटेको टोलीले छुट्टा छुट्टै पसलबाट पसल सञ्चालक सहित ४६९ बोरा सिमेन्ट सहित नियन्त्रणमा लिएको हो ।
जनकपुरधाम उपमहानगरपालिका वडा नं. ११ मा सञ्चालित रहेको आनन्द इन्टर प्राइजेज हार्डवेयरका संचालक जनकपुरधाम उपमहानगरपालिका १ का ४८ वर्षीय राम प्रताप साह र वडा नं. ४ माछाबाजार स्थित सञ्चालनमा रहेको चन्दन आइरन स्टोरका संचालकका छोरा २० वर्षीय चञ्चल चौधरीलाई नियन्त्रणमा लिएको जिल्ला प्रहरी कार्यालय धनुषाका प्रहरी प्रवक्ता प्रहरी नायव उपरीक्षक रामेश्वर कार्कीले जानकारी दिएका छन् ।
साहलाई ४९ बोरा र चौधरीलाई ४ सय २० बोरा सिमेन्ट सहित नियन्त्रणमा लिई कालोबजारी मुद्दामा ७ दिनको म्याद लिई आवश्यक अनुसन्धान थालेको प्रहरीले जनाएको छ । दुवै जना बजार भाउ भन्दा बढी मुल्यमा सिमेन्ट विक्री गर्दै आएका थिए ।
यो विषयमा टिप्पणी गर्नुहोस् !