द सौर्य मिथिला समाचारदाता
जनकपुरधाम, वैशाख १९ ।
जनकपुरधाम उपमहानगरपालिकामा लकडाउनका कारण भोक भोकै दिन कटाउन बाध्य भएका विपन्न तथा दैनिक ज्यालादारीमा काम गर्नेहरुका लागि राहत वितरण गर्ने कार्य जारी रहेको छ ।
राहत लिनकै लागि जनकपुरधाम उपमहानगरपालिका वडा नम्बर २४ बसहियाका सलिम हुसैन समेत लाइनमा उभिएका थिए । तर साफीलाई रित्तै हात फर्काइयो ।
राहतका लागि तयार पारिएको सूचीमा नाम नरहेको भन्दै आफूलाई राहत उपलब्ध नगराइएको उनले दुखेसो पोखे ।
साफीले भने ‘यहाँ हुनेखानेलाई राहत बाँडिएको छ, हामी जस्तो गरिबलाई राहतको सूचीमा समेत नाम राखिएको छैन ।’ राहतमा समेत विभेद देखेर मन एकदमै खिन्न भएको उनले बताए ।
साफी उमेरले ७० वर्ष पार गरि सकेका छन् । घरमा दुई छोरो बुहारी नाती नातिनी छन् । घरको आम्दानीको श्रोत वैदेशिक रोजगारीमा रहेका दुई छोराको कमाई नै हो ।
एक छोरो कतारमै विगत ३ महिनादेखि बिरामी परेको भन्दै गहभरी आँशु झार्दै भने ‘हामी अब के गरी खाने ।’
राहत नपाउनेहरु मध्ये एक थिए रामस्वरुप दास । दासलाई पनि राहतको लाइनबाट निकालिएको उनले सुनाए ।
दासले भने‘ यहाँ दुइ तल्ले तीन तल्ले घर भएको, बिघाको बिघा जग्गा रहेको धनी व्यक्तिलाई राहत दिइएको छ तर हामी जस्ता दैनिक ज्यालादारीमा काम गर्नेहरुका लागि राहत नै भएन ।’ गरिबका लागि सबै ठाउँमा विभेद नै हुन्थ्यो अब राहतमा समेत विभेद भईरहेको छ दासले भने ।
दास दैनिक ज्यालादारीमा काम गर्ने मजदुर हुन् । उनको घरमा वृद्ध आमा, पत्नी, छोरा छोरीहरु छन् । यो लकडाउनको घडीमा कसरी उनीहरुकोे जिविका चलाई रहेको छु मलाई थाहा छ दासले भने ।
उनले अगाडी आक्रोश पोख्दै भने ‘ सरकारले हाम्रो लागी लकडाउन खोलि देओस, भोकै मर्नु नै छ अब त्यसै पनि मर्न हामी तयार छौँ ।’
जनकपुरधाम २४ बसहियामा राहत वितरणमा विभेद भएको स्थानीयहरुको आरोप रहेको छ । स्थानीय राम ईश्वर मण्डलले आफ्नो मान्छेलाई राहतको सूचीमा नाम समावेश गरिएको छ तर असलमा गरिब रहेकाहरुको नाम नै समावेश गरिएको छैन ।
यता वडाध्यक्ष सत्यनारायण साहले राहत वितरणमा कुनै प्रकारको विभेद नगरिएको दावी गरेका छन् । राहत वितरणमा केही न केही हल्ला भई नै हाल्छ भन्दै भने ‘हामी हल्लाको पछाडी लाग्यौँ भने राहत नै वितरण नै गर्न सक्दिन ।’
यो विषयमा टिप्पणी गर्नुहोस् !