रासस
सर्लाही, बैशाख १८ ।
लकडाउनका समयमा आपूर्ति सहज नहुँदा जिल्लामा औषधि अभाव देखिन थालेको छ । सरकारले अत्यावश्यक वस्तुको आपूर्तिमा कुनै रोक नलगाएको भए पनि ढुवानीको असहजताका कारण औषधि अभाव देखिन थालेको औषधि व्यवसायीले बताएका छन् ।
विशेषगरी दम, मधुमेह, उच्चरक्तचाप, थाइराइड र मानसिक समस्या भएका बिरामीले सेवन गर्ने औषधि बजारमा अभाव देखिन थालेको डा घनश्याम सिंहले जानकारी दिए ।
कोरोनाको सङ्क्रमण फैलिन नदिन सीमानाका सिल गरिएका कारण नेपाली बजारमा नपाएका औषधि भारतबाट समेत ल्याउन नपाएको स्थानीयवासीले गुनासो गरेका छन् ।
सरकारले कोरोना सङ्क्रमण रोक्न लगाएको लकडाउन स्वागतयोग्य रहेको बताउँदै गम्भीर रोगबाट ग्रसित बिरामीको औषधि आपूर्तिका लागि पनि सरकारले कुनै ठोस निर्णय लिनुपर्ने स्थानीयवासीले बताएका छन् ।
नेपालका औषधि उत्पादक कम्पनीले प्रायः आपूर्ति सहज हुने ठूला शहरमा मात्र बढी जोड दिएका कारण साना शहरबजारमा औषधि अभाव देखिने अवस्था आएको व्यवसायीको गुनासो छ ।
औषधि व्यवसायीले लकडाउनका कारण आपूर्तिमा आएको असहजता, औषधि कम्पनीबाट नगद कारोवारको अनिवार्य प्रावधान लागू र आवश्यक औषधि बिरामी आफैँ गएर ल्याउनुपर्नेजस्ता कारणले बजारमा औषधिको अभाव देखिन थालेको स्थानीय औषधि व्यवसायीले बताएका छन् ।
बजारमा औषधि अभाव भएका कारण सामान्य स्वास्थ्य परेका बिरामीको जाँचमा समेत समस्या शुरु भएको चिकित्सक बताउँछन् ।
विवादका कारण राहत वितरण भद्रगोल
कोरोना भाइरस सङ्क्रमणबाट मुलुकलाई बचाउन गरिएको लकडाउनका कारण सङ्कटमा परेका विपन्न र गरिब परिवारलाई वितरण गरिनुपर्ने राहत सामग्री सर्लाहीमा अझै पनि वितरण हुनसकेको छैन ।
लकडाउन शुरु भएको ३८औँ दिन बित्न लाग्दासमेत जिल्लाका कतिपय स्थानीय निकायले राहत वितरण नै गर्न सकेका छैनन् ।
कतिपय स्थानीय निकायमा राहत वितरणमा विवाद हुँदा सुरक्षाकर्मीले अश्रुग्याससमेत प्रहार गर्नुपरेको छ भने कुनै स्थानीय निकायमा जनप्रतिनिधिमाथि नै स्थानीयवासीले आक्रमण गरेका छन् ।
रामनगर गाउँपालिका–४ मा राहत वितरण गर्ने क्रममा स्थानीयवासीको भीडले वडा कार्यालयमा तोडफोडसहित जनप्रतिनिधिमाथि आक्रमण गरेका थिए ।
विवाद भएपछि उक्त वडामा हाल राहत वितरण रोकिएको गाउँपालिका अध्यक्ष कृष्णकुमार बर्माले जानकारी दिए ।
त्यसैगरी ईश्वरपुर नगरपालिका–१५ गौरीशङ्करमा केही दिनअघि राहत वितरणका क्रममा झडप भयो । वास्तविक विपन्न परिवार छुटेको तर नेता कार्यकर्ताका परिवार राहत पाउने लिष्टमा परेको भन्दै स्थानीयवासीले वडाध्यक्षसहितलाई आक्रमणको प्रयास गरेका थिए ।
झडप नियन्त्रणमा लिनका लागि प्रहरीले दुई सेल अश्रुग्यास नै प्रहार गरेको थियो । कौडेना गाउँपालिकाकामा अहिलेसम्म राहत वितरण शुरु नै हुनसकेको छैन ।
वडाबाट विपन्न परिवारको लगत सङ्कलनमा ढिलाइ भएकाले राहत वितरणको काम शुरु गर्न नसकिएको गाउँपालिका अध्यक्ष रामप्रसाद राय यादवले जानकारी दिए ।
बलरा नगरपालिकाकाका केही वडामा बाहेक अरु वडामा राहत वितरण हुनसकेको छैन ।
११ वडा रहेको बलरामा ३ नं वडाबाहेक सबैमा नगद नै दिने तयारी भइरहेको नगरप्रमुख अभयकुमार सिंहले जानकारी दिए ।
“सबै वडालाई रु तीन–तीन लाखका दरले बजेट निकासा गरिएको र सबै वडाले त्यही रु तीन लाखलाई परिवार सङ्ख्याअनुसार दामासायी नगद नै दिने तयारी गरिरहेका छन्”, नगरप्रमुख सिंहले बताए ।
नगरपालिकामा हालसम्म वडा नं ३, ७, ९ र ११ मा राहत वितरण भइसकेको साथै २ र ४ नं वडामा पनि दुई दिनभित्र राहत वितरण शुरु हुने नगरप्रमुख सिंहले बताए ।
त्यस्तै बसबरिया गाउँपालिकामा पनि हालसम्म राहत वितरण हुनसकेको छैन ।
खाद्यान्न खरिदका लागि बोलपत्र प्रक्रिया सकिएको र अब एक-दुई दिनभित्र गाउँपालिका कार्यालयमा सामान आइपुग्ने बसबरिया गाउँपालिकाका अध्यक्ष रामअयोध्या रायले बताए ।
त्यहाँ पनि वडावडाबाट सङ्कलन भएको लगतअनुसार तीन हजार घरधुरीलाई राहत वितरण गर्ने तयारी भएको छ ।
यो विषयमा टिप्पणी गर्नुहोस् !