द सौर्य मिथिला समाचारदाता
जनकपुरधाम, वैशाख १० । प्रत्येक वर्ष जनकपुरधाममा मनाइदै आएको जानकी नवमीमा यस वर्ष विशेष उत्सवहरु नहुने भएको छ । विश्वभरी कोरोना भाइरसको महामारी फैलिएका कारण नेपाल सरकारले लकडाउन लगाएपछि जानकी नवमी उत्सवममा समेत यसको असर परेको छ ।
नेपाल सरकारले लगाएकोे लकडाउनको पालना गर्दै जानकी नवमीको अवसरमा यस वर्ष कुनै प्रकारको उत्सव नगरिने जानकी मन्दिरका उत्तराधिकारी महन्थ रामरोशन दासले जानकारी दिएका छन् ।
उत्सवकै समयमा कोरोना महामारीको त्रास रहेकाले नेपाल सरकारले लगाएको लकडाउनको पालन गर्नु अहिलेको आवश्यक्ता रहेको उनले बताए । प्रत्येक वर्ष वैशाख शुक्ल नवमीका दिन मनाइदै आएको जानकी जन्मोत्सवका दिन जानकी मन्दिरले भव्य कार्यक्रमको आयोजना गर्दै आएको थियो । यस वर्ष मन्दिर भित्रै जानकी जन्मोत्सवको अवसरमा ९ दिनसम्म पूजा अराधना गरिने महन्थ दासले बताए ।
उनका अनुसार वैशाख १२ गते घटस्थापना हुनेछ भने जानकी जन्मोत्सव मन्दिर भित्रै वैशाख २० गते मनाइने छ । महन्थ दासले विश्वभरी कोरोना महामारी फैलिएकोले जानकी जन्मोत्सवका दिन घर घरमै विशेष आरती गर्न तथा दिपोत्सव गर्न आग्रह गरेका छन् ।
यो विषयमा टिप्पणी गर्नुहोस् !