पर्सा, बैशाख ७ । नेपाल औषधि व्यवसायी सङ्घ पर्साले जिल्लामा सञ्चालित सम्पूर्ण औषधि पसल शनिबार अपराह्नदेखि अनिश्चितकालका लागि बन्द गराएको छ । सङ्घ पर्साका अध्यक्ष ताजुद्दीन अन्सारीमाथि प्रहरीले गरेको दुव्र्यवहारको विरोधमा सङ्घले जिल्लाभरिका औषधि पसल बन्द गराएको हो ।तरकारी खरिद गर्न निस्केका अन्सारीलाई प्रहरीले दुव्र्यवहार गरी मोटरसाइकल नियन्त्रणमा लिएको विरोधमा सङ्घले पसल बन्द गराएको नेपाल औषधि व्यवसायी सङ्घ प्रदेश नं २ का महासचिव पप्पु झाले जानकारी दिए । उनले लकडाउनका क्रममा औषधि व्यवसायीमाथि प्रहरीले गर्दै आएको दुव्र्यवहारलाई रोक्न स्थानीय प्रशासनलाई पटकपटक जानकारी दिँदा पनि घटना रोकिनुको सट्टा पर्साका अध्यक्षमाथि नै दुव्र्यवहार भएपछि बाध्य भएर पसल बन्द गराउनु परेको बताए ।
जिल्लामा सञ्चालित औषधि पसल बन्द भएपछि उपभोक्ता भने मारमा परेका छन् । अतिआवश्यक औषधि खरिद गर्न नपाउँदा आफन्तको ज्यान नै जोखिममा पर्ने हो कि भन्नेमा उपभोक्ता चिन्तित छन् । यसै विषयमा पर्साका सहायक प्रमुख जिल्ला अधिकारी ललितकुमार बस्नेतसँग बुझ्दा उनले तोकिएको समयमा खाद्य सामग्री खरिद गर्न जाँदा सवारी साधन प्रयोग गर्न स्थानीय प्रशासनले लगाएको प्रतिबन्ध उल्लङ्घन गरेकाले अन्सारीको मोटरसाइकल प्रहरीले नियन्त्रणमा लिएको बताए । उनले बन्द गराइएका पसल तत्काल खोल्न सङ्घका पदाधिकारीसँग छलफल भइरहेको जानकारी दिए ।
समाजसेवी रुङ्गटाद्वारा अस्पताललाई केविन हस्तान्तरण
वरिष्ठ उद्योगपति एवं समाजसेवी अनिल रुङ्गटाले वीरगञ्जको नारायणी अस्पताललाई एक थान स्वाब सङ्कलन केविन हस्तान्तरण गर्नुभएको छ । अस्पतालमा शनिबार आयोजित एक कार्यक्रममा समाजसेवी रुङ्गटाले अस्पतालका मेडिकल सुपरिडेन्डेन्ट मदन उपाध्यायलाई अत्याधुनिक केविन हस्तान्तरण गर्नुभएको हो ।
अस्पतालमा रहेका कोभिड-१९ सङ्क्रमित तथा अन्यको सुरक्षित स्वाब सङ्कलनका लागि अत्याधुनिक केविन दिइएको रुङ्गटाले बताए । सङ्क्रमितको उपचारमा संलग्न चिकित्सक नै सङ्क्रमित भएको घटना विश्वभरि नै भइरहेकाले त्यस्ता घटनाबाट नारायणी अस्पतालका चिकित्सक तथा स्वास्थ्यकर्मीलाई जोगाउन केविन दिइएको उनले बताए । रु ६० हजारको लागतमा तयार पारिएको केविनबाट सङ्क्रमित तथा अन्यको सुरक्षितरूपमा स्वाब सङ्कलन गर्न ठूलो मद्दत पुग्ने मेसु उपाध्यायले जानकारी दिए ।
रासस
यो विषयमा टिप्पणी गर्नुहोस् !