द सौर्य मिथिला समाचारदाता
जनकपुरधाम, वैशाख ४ । अहिले कोरोना भाइरसको संक्रमणको त्रासका कारण पूरै देश लकडाउनमा छ । लकडाउनका कारण घरभित्र नै क्वारेन्टाइनमा बस्नु, बेला–बेलामा साबुनपानीले हात धुनु, बाहिर निस्कनै परे मास्क प्रयोग गर्नु जस्ता क्रियाकलाप आम मानिसको दैनिकी बनेको छ । लकडाउनले घरभित्रै सुरक्षित बसेको भए पनि कोरोनाको मानसिक त्रासले सबैलाई ग्रसित बनाएको छ । यसको असर मिथिला चित्रकारहरुमा समेत परेको छ । मिथिला चित्रकलामा बनाउन व्यस्त रहेका कलाकारहरुको मनोदशामा समेत कोरोनाको प्रभाव परेको छ । मिथिला चित्रकला बनाउने कलाकारहरु लकडाउनकोे समयलाई उपयोग गर्दै आफ्नो त्रित्रमा कोरोनालाई लिएर सचेतना जगाउनमा व्यस्त छन् । ती कलाकारहरुको प्रत्येक चित्रमा कोरोना बिरुद्धको शंखनाद गरेको देखिन्छ ।
मिथिला चित्रकार विजय दत्त मणिले बनाएको आफ्नो एक चित्रमा एक पुरुष आफ्नो धनुष वाणको सहयोगमा कोरोनालाई भगाई रहेको देखिन्छ । मिथिला कलालाई निरन्तरता दिइरहेका अर्का चित्रकार सुनैना ठाकुरले भने सिंगो मुलुक कठिनाइसँग जुधिरहेको अवस्थालाई कारुणिक रूपमा चित्रमा व्यक्त गरेकी छन् । उनको चित्रमा एउटी महिलालाई चारैतिर कोरोना भाइरसले आक्रमण गरिरहेको छ । झन्डा काखमा लिएर दुःखी देखिएकी महिलालाई ठाकुरले नेपाल आमाका रूपमा चित्रण गरेकी छन् । उनले ‘घरमै बसौं, हात मिलाउनुको सट्टा नमस्कार गरौं, साबुनपानीले हात धोऔं र मास्क प्रयोग गरौं’ जस्ता सन्देश पनि चित्रमार्फत नै प्रस्तुत गरेकी छन् ।
‘मेरो चित्र अहिले एउटा कलाकृति मात्र होइन,’ उनले भनिन्, ‘प्रत्येक नागरिकलाई सुरक्षित र सचेत बनाउन यस चित्रले सघाउने छ ।’
सचेतनाका लागि चित्रलाई सामाजिक सञ्जालमार्फत प्रदर्शन गरिएको उनले बताइन् ।अधिकांश चित्रकारले आफ्नो कलाकृतिमा मास्क र कोरोना भाइरसको स्केचलाई बिम्बका रूपमा प्रयोग गर्दै अहिलेको कठिन समय उतारेको देख्न सकिन्छ । उनीहरूले चित्रलाई आआफ्नो सामाजिक सञ्जालमा पोस्ट गरि रहेका छन् । चित्रमार्फत नै माया, करुणा, सकारात्मक र सिर्जनशील भाव प्रस्तुत गरेर मनको आवेगलाई नियन्त्रण गर्न ती चित्रकारहरुले आह्वान गरेका छन् ।
यो विषयमा टिप्पणी गर्नुहोस् !