द सौर्य मिथिला समाचारदाता
जनकपुरधाम, वैशाख ३ । विश्वभरी कोरोना भाइरसको संक्रमण फलिने खतरा कायम रहेको समयमा नेपाल सरकारले लकडाउनलाई निरन्तरता दिएको छ । कोरोना संक्रमण फैलिन नदिन पूरै देश अहिले पनि लकडाउनमा छ । यद्यपि प्रदेश दुईको अस्थायी राजधानी जनकपुरधाममा नै लकडाउनको उल्लंघन भई रहेको देखिएको छ । जिल्ला विपद व्यवस्थापन समिति धनुषाले गरेको निर्णयपछि लकडाउन उल्लंघनका घटनाहरु बढेको हो । मंगलबारसम्म लकडाउन कार्यान्वयन गराउन पूर्ण रुपमा कडाई गरिएपनि जनकपुरधाममा विपद् व्यवस्थापनको निर्णयपछि बुधबारदेखि बजारमा चहलपहल बढेको छ ।
मंगलबार धनुषाका प्रमुख जिल्ला अधिकारी कोषहरी निरौलाको अध्यक्षतामा बसेको ‘क्राईसिस म्यानेजिङ सेन्टर’ को जिल्ला स्तरीय योजनाको बैठकले खाद्यान्न, इन्धन, औषधी, दुध, खानेपानी, तरकारी लगायतका अत्यावश्क उपभोग्य वस्तु बिहान ५ बजेदेखि अपराह्न ४ बजेसम्म खरिदबिक्री गर्न सकिने निर्णय गरेको थियो । यस्ता सामाग्री खरिद बिक्री गर्दा सामाजिक दूरी कायम गर्नुपर्ने निर्णयमा उल्लेख गरिएको छ ।विपद् व्यवस्थापन समितिले अत्यावश्यक उपभोग्य वस्तुहरु मात्र खरिद बिक्री गर्न सकिने निर्णय गरेको छ तर यस बाहेकका अन्य पसल पनि खुलेका छन् ।विपद् व्यवस्थापन समितिको यस्तो निर्णय आएसँगै पसलमा भीडभाड बढेको छ भने सवारी साधन पनि गुड्न थालेका छन् ।समितिको निर्णयको यहाँका कतिपय स्थानीयले विरोधसमेत गरेका छन् । कोरोना संक्रमणको खतरा बढिरहेको बेला लकडाउनलाई थप कडाइ गर्नुपर्नेमा यस्तो निर्णय गरेर जोखिम बढाउने काम भएको मासका संयोजक सरोज मिश्रले बताए ।कोरोना संक्रमण रोकथाम गर्नु प्राथमिकता हुनुपर्नेमा विपद् व्यवस्थापन समितिको निर्णयले लकडाउनको धज्जी उडाएको उनको भनाइ छ ।
विपद व्यवस्थापन समितिको निर्णयपछि कामै नभए पनि सामान खरिद गर्ने बहानामा मानिसहरु सडकमा हिंड्न थालेको मिश्रले बताए । विपद व्यवस्थापन समितिका अध्यक्ष समेत रहेका धनुषाका प्रमुख जिल्ला अधिकारी कोषहरि निरौलाले बहाना बनाएर सडकमा हिँड्नेलाई कारबाही गर्ने चेतावनी दिएका छन् । खाद्यान्न लगायतका अत्यावश्यक वस्तु बाहेक अन्य पसल सञ्चालन गर्ने निर्णय नभएको उनले स्पष्ट पारे । त्यसको विपरित जनकपुरधाम बजारमा पसलहरु उल्लेख्य संख्यामा खुलेका छन् भने मानिसहरुको आवतजावत समेत बढेको छ ।
यो विषयमा टिप्पणी गर्नुहोस् !