द सौर्य मिथिला समाचारदाता
जनकपुरधाम, वैशाख २ । प्रदेश दुईमा केही दिन भित्रै ४ वटा संक्रमित भेटिएपछि यहाँ पनि त्रास बढेको छ । प्रदेश दुुई कोरोना संक्रमणको हिसाबले हटस्पटको रुपमा रहेपनि यहाँ अपनाउनु पर्ने सतर्कता अझै देखिएको छैन । प्रदेश दुईको ग्रामीण संगै शहरी क्षेत्रमा समेत अहिले पनि लापरवाही देखिएको छ । ग्रामीण क्षेत्रमा अहिले पनि हाट बजार लागि रहेको छ । त्यहाँ सयौँको भीड लागेको हुन्छ । ती बजारहरुमा सामाजिक दुरीको कुनै ध्यान राखिएको हुँदैन । जुन ससंक्रमणको हिसाबले एकदमै घातक हुन सक्छ । वीरगञ्जको छपकैया स्थित एक मस्जिदमा बस्दै आएका ३ जनामा र रौतहटको एक १९ वर्षीय किशोरमा कोरोना संक्रमण देखिएपछि थप सतर्कता अपनाउनु पर्ने आवश्यक्ता रहेको विभिन्न ठाउँबाट आवाज उठिरहेको छ । हुनत शहरमा सुरक्षाकर्मीहरु लकडाउन तथा सामाजिक दुरी पालन गराउन हरसम्भव प्रयास गरिरहेको कुरोलाई नकार्न सकिदैन
प्रदेश २ सरकारले प्रत्येक जिल्ला विपद व्यवस्थापन कोषमा ५० लाख रुपैयाँ पठाएको थियो । उक्त रकमले कोभिड १९ को संक्रमण फैलिनबाट रोकथाम गरी विपद जोखिम न्युनीकरण र पूर्व तयारीका लागि आवश्यक सामाग्री, उपकरण लगायतका अत्यावश्यक व्यवस्थापन तथा उपचार प्रयोजनका लागि खर्च गर्ने निर्णय भएपनि हालसम्म उक्त रकम खर्च हुन सकेको छैन । वीरगन्ज महानगरपालिकाका मेयर विजयकुमार सरावगीले आफूले विगत १३ दिनदेखि नै कोरोना विशेष अस्पताल स्थापनाका लागि पहल गरे पनि सफल नभएको गुनासो गरे । मेयर सरावगीले केन्द्र सरकारलाई सम्पर्क गर्दा प्रदेशको जिम्मा हो भन्ने गरेको र प्रदेशलाई सम्पर्क गर्दा केन्द्रतिर इसारा गर्ने गरेको दुखेसो पोखे ।
मस्जिदमा बस्दै आएका ३ भारतीय मुस्लिम धर्म प्रचारकमा कोरोना देखिएको स्वास्थ्य मन्त्रालयले पुष्टि गरेपछि वीरगन्ज महानगरपालिका २ छपकैया क्षेत्रलाई सिल गरि ‘कन्ट्याक्ट ट्रेसिङ’ सुरु गरिएको छ । स्थानीय प्रशासनले उक्त क्षेत्रलाई सिल गरि संक्रमति व्यक्तिको सम्पर्कमा आएकाहरुको खोजी समेत गरिरहेको छ । कन्ट्याक्ट ट्रेसिङको काम नेपाली सेनाको टोलीले गरिरहेको छ । भारतको दिल्लीस्थित तबलिगी जमाबाट फर्किएका ती जमातीहरु अभद्र व्यवहार देखाईरहेको अस्पतालका चिकित्सकहरु बताई रहेका छन् । नारायणी अस्पतालको आइसोलेसनमा शुक्रबार साँझदेखि राखिएका कोरोना संक्रमित आइसोलेसन वार्ड बाहिर सुरक्षामा खटिएका एक सुरक्षाकर्मीका अनुसार आइसोलेसनमा रहेका तीनजना भारतीय जमातीले डाक्टर र नर्सका कुरा नमान्ने, रोग सारिदिन्छु भनेर धम्क्याउने गरेको बताए ।
यो विषयमा टिप्पणी गर्नुहोस् !