जनकपुरधाम, साउन ४ । नेपालको बहुप्रतिक्षित जयनगर–जनकपुरधाम–कुर्था रेल सञ्चालनको लागि करारमा विभिन्न २९ पदको लागि विज्ञापन आह्वान गरिएको थियो । रेल्वेको करारको जागिरका लागि ३२ हजार भन्दा बढीले दर्खास्त भरेका थिए तर तिनीहरुले न त जागिर पाए न पैसा । नेपाल रेल्वे कम्पनी लिमिटेडले करारमा कर्मचारी भर्नाको लागि आह्वान गरेको विज्ञापन रद्द भएको कयौँ महिना बितिसक्दा पनि दर्खास्त भर्नेहरुले अहिले सम्म पैसा फिर्ता पाउन सकेका छैनन् ।
रेल्वे कम्पनीले गत भदौ २९ गते करारमा विभिन्न २९ पदको लागि १ सय २९ जना कर्मचारी माग्दा ३२ हजार ६ सय ८६ जनाले दरखास्त भरेका थिए । रेल्वे कम्पनीले अधिकृत स्तरको प्रत्येक विज्ञापनको लागि १ हजार, सहायक स्तरको लागि ४ सय र श्रेणीविहिन स्तरको विज्ञापनको लागि ३ सय रुपैया दस्तुर तय गरेको थियो तर विज्ञापन रद्द भएपनि तिनीहरुले पैसा फिर्ता पाउन सकेनन् ।
रेल्वे कम्पनीले आह्वान गरेको विज्ञापनमा अधिकृत स्तरको पदका लागि १ हजार २ सय २४ जना, सहायक पदको लागि २९ हजार ५ सय ५४ जना र श्रेणीविहिन पदका लागि १ हजार ८ सय ६८ जनाले दरखास्त दिएका थिए ।
अधिकृत स्तरको विज्ञापनबाट १२ लाख २४ हजार, सहायक स्तरको विज्ञापनबाट १ करोड १८ लाख २१ हजार ६ सय र श्रेणी विहिन स्तरको विज्ञापनबाट ५ लाख ६० हजार ४ सय गरी कुल १ करोड ३६ लाख ६ हजार रुपैया राजश्व संकलन गरिएको थियो ।
अधिकृत स्तर तर्फ स्टेशन मास्टरका लागि ९ सय ८ जना, शाखा अधिकृतका २ सय ५४ जना र कानून अधिकृतका लागि ६२ जना दरखास्त दिएका थिए ।
यता नेपाल रेल्वे कम्पनी लिमिटेडका महाप्रबन्धक गुरु भट्टराईले मन्त्रीपरिषद्को निर्णय अनुसार नै करारमा कर्मचारी भर्नाको लागि विज्ञापन आह्वान गरेपनि लोकसेवा आयोगको हस्तक्षेपको कारण विज्ञापन रद्द गर्नु परेको भन्दै दरखास्त दिएकाहरुको रुपैया फिर्ता हुने बताए । उनले पैसा फिर्ता गर्नेमा कुनै शंकै नरहेको भन्दै भने, ‘हामीले कुन प्रकृयाबाट पैसा फिर्ता गर्ने त्यसमा छलफल भइरहेको छ । ३२ हजारलाई व्यक्तिगत रुपमा पैसा फिर्ता गर्नु सम्भव छैन, त्यसैले बैँक सँग छलफल चलिरहेको छ ।’
भट्टराईले दरखास्त भर्नेहरुमध्ये धेरैको बैँक खाता हुन नसक्ने भएकोले र सरकारी निकायले नगरमा पैसा फिर्ता गर्न नसक्ने भएकोले बैँकबाटै भुक्तानी गर्न छलफल चलिरहेको दावी गरे । उनले अगाडी भने, ‘बैँकसँग समन्वय गरेर दरखास्तको ओरिजिनल भौचर संकलन गरेर पैसा फिर्ता गर्नुपर्ने लिस्ट बनाएर पठाउँछौँ । पैसा फिर्ता हुन्छ नै ।’
भारतको सिमावर्ती क्षेत्र जयनगर देखि धनुषाको कुर्था सम्म चल्ने रेलका लागि भौतिक निर्माणको कार्य सम्पन्न भइसकेको छ भने दुई सेट रेल समेत खरिद गरिसकिएको हो । नेपाल सरकारले गत असोज २ गते नै दुई सेट रेल नेपाल ल्याइसकेको हो । हाल दुवै सेट रेल धनुषाको जनकनन्दिनी गाउँपालिका स्थित इनर्वा स्टेशनमा राखिएको छ भने आइतबार मात्र रेल्वे ट्रयाकको सफल परिक्षण गरिएको छ । यद्यपी रेल सञ्चालन भने अन्यौलमै रहेको हो ।
यो विषयमा टिप्पणी गर्नुहोस् !