द सौर्य मिथिला समाचारदाता
जनकपुरधाम,चैत २७ गते । जनकपुरधाम उपमहानगरपालिकाले कोरोना रोकथामका लागि कुुनै प्रकारको कदम नउठाएको आरोप विगत केही दिन यता उठ्दै आई रहेको छ । उपमहानगरले कोरोना संक्रमण रोक्न आफ्नो स्तरबाट केही गर्न नसकेपछि स्थानीय मात्र नभई वडाध्यक्षहरु नै आलोचना गर्दै आई रहेका छन् ।काम नगरेको आरोप लागि रहेको समयमा जनकपुरधाम उपमहानगरपालिकाले कोरोना भाइरसको रोकथामका लागि नगरभित्र सेनिटाइजको नाममा लाखौं रुपैयाँ झ्वाम्म पारेको आरोप समेत लाग्न थालेको छ । गत आर्थिक बर्षको विपद् व्यवस्थापन कोषमा रहेको लाखौं रुपैयाँ प्रमुख र उपप्रमुख नगरभित्रका आफ्नो नेता कार्यकर्ता र आसेपासेको घर अगाडी मात्र सेनिटाईज गराएर अनियमितता गरेको स्थानियहरुले बताए ।
नगरभित्र सेनिटाइजको नाममा सो रकम खर्च गरेतापनि हालसम्म अधिकांश ठाउँमा सेनिटाइज नै गरिएको छैन, स्थानीय पुष्पा मिश्रले आरोप लगाईन । उनका अनुसार आफ्नो टोलमा एकदिन पनि सेनिटाइज गरिएको छैन् । वडाध्यक्षलाई सो सम्बन्धमा पटक पटक ताकेदा गर्दा पनि उनले कुनै चासो नदेखाएको उनको गुनासो गरिन् । त्यस्तै स्थानीय सञ्चारकर्मी राजेश कुमार कर्णले सामाजिक सञ्जालमा तिनवटा सांकेतिक तस्बिरहरु राखेर लेखेका छन्,‘सेनिटाइजमा जनकपुरधाम उपमहाननगरको विपद् व्यवस्थापन कोषको ८० लाख सकियो, तपाईंको घर कति पटक सेनिटाइज भयो रु एउटा घरको सेनिटाइज खर्च मुश्किलले ३ सय रुपैयाँ लाग्ने । त्यस अनुसार सबै जनकपुरधामवासीको कम्तीमा ३ पटक हुनुपर्ने हो । फेरि भन्नुहोस कति पटक भयो ?’यस सम्बन्धमा नेपाल पत्रकार महासंघ धनुषाका अध्यक्ष अनिल मिश्रले भने,‘सरकारी कर्मचारी र उच्च पदस्थ व्यक्तिहरुको बसोबास रहेको जनकपुरधाम उपमहानगरपालिका वडा नम्बर–४ स्थित पिडरीया माईस्थान एरियामा मेरो पनि घर छ तर त्यहाँ सेनिटाइज गर्ने कुरा त परै जाओस अहिलेसम्म लामखुट्टे मार्ने औषधिको धुवाँ समेत देखिएको छैन् ।’
यो विषयमा टिप्पणी गर्नुहोस् !