द सौर्य मिथिला समाचारदाता
जनकपुरधाम, चैत २६ । कोरोना भाइरसको संक्रमण बढ्न सक्ने खतराका कारण लगाइएको लकडाउनले गर्दा गम्भीर प्रकृतिका बिरामीहरुका लागि चाहिने औषधिको जनकपुरधाममा अभाव देखिएको छ । लकडाउनका कारण औषधी बाहिरबाट ल्याउन नसक्ने भएकोले गम्भिर प्रकृतिको रोगको औषधीहरुको अभाव भएको औषधी व्यवसायीहरु बताउँछन् । औषधीको अभाव देखिएपछि मृगौला, क्षयरोग, क्यान्सर, मधुमेह,उच्च रक्तचाप,मानसिक समस्या र आइसियुमा उपचाररत बिरामीहरू समस्यामा परेका छन् । प्रदेश दुईमा मात्रै हजारौँको संख्यामा रहेका गम्भीर प्रकृतिका रोगको बिरामीहरु औषधि नपाएर समस्यामा पर्न थालेका छन् । त्यस्ता रोगहरुको औषधी क्रिटिकल्स मेडिसिनको श्रेणीमा आउने गरेको एक औषधी व्यवसायीले जानकारी दिदै भने अहिलिे ती औषधीहरुको उपलब्धता छैन । ती औषधीहरु स्वास्थ्य मन्त्रालयसंग अनुमिित लिएर एक पटक मात्रै ल्याउन सक्ने प्रावधान रहेको उनको भनाई छ । ती औषधी व्यवसायीको अनुसार जनकपुरधाममा त्यस्ता औषधीहरुको खपत बढी नभएकोले भारतबाट ल्याउने गरेको बताए । तर अहिले भारतससंगको सीमा पूर्ण रुपमा बन्द रहेकोले त्यस्ता औषधीहरुको अभाव रहेको बताए ।
सबै प्रकारका बिरामीको स्वास्थ्योपचार र औषधिको ग्यारेन्टी गरी नागरिकको स्वास्थ्यसम्बन्धी हक सुनिश्चित गर्नुपर्नेमा उल्टै यस्तो बिषम परिस्थितिमा औषधि नै उपलब्ध नहुनु सरकारमाथि प्रश्नचिन्ह खडा भएको जनकपुरधाम उपमहानगरपालिका वडा नम्बर ४का नरेश ठाकुरले आरोप लगाए । संविधानको धारा ३५, जनस्वास्थ्य सेवा ऐन, २०७५ तथा नेपाल पक्ष राष्ट्र भएको आर्थिक, सामाजिक तथा सांस्कृतिक अधिकारसम्बन्धी महासन्धि १९६६ ले प्रत्याभूत गरे बमोजिम हरेक व्यक्तिको आकस्मिकलगायत सबै प्रकारका स्वास्थ्य सेवा लिन पाउने अधिकार सुनिश्चित गर्न स्थानीय रोशन सिंह राणाले सरकारसँग आग्रह गरेका छन् ।
यो विषयमा टिप्पणी गर्नुहोस् !