द सौर्य मिथिला समाचारदाता
जनकपुरधाम, चैत २५ । कोरोनाको लडाईमा जनकपुरधाम उपमहानगरपालिकाको फितलो तयारी रहेको छ । विश्वभर कोरोना भाइरस (कोभिड १९) महामारीको रुपमा फैलिदै गएपछि सबै तहका सरसरकारले आ-आफ्नो तर्फबाट तयारी गरेको भएतापनि प्रदेश २ को अस्थाई राजधानीको रुपमा रहेको जनकपुरधाममा अहिले सम्म स्थानिय सरकारको तर्फबाट कुनै तयारी गरिएको छैन् । उपमहानगरमा नगरप्रमुख लालकिशोर साहले भिडियो संदेशबाहेक कोरोनाको महामारीबाट बँच्न अहिले सम्म कुनै तयारी गरेका छैनन् ।
कोरोनाको महामारीबाट बँच्न संघ सरकार देखि लिएर स्थानिय सरकारहरु आ-आफ्नो तर्फबाट तयारी गरेको छ । सम्भावित कोनोरा संक्रमितहरुलाई अरुमा कोरोना फैलन नदिन क्वारेन्टाइन तथा आइसोलेशनको व्यवस्था गरेतापनि धनुषाको एक मात्र उपमहानगरपालिका तथा प्रदेशको अस्थाई राजधानी जनकपुरधाममा अहिलेसम्म कुनै तयारी थालिएको छैन् । कुल १८ स्थानिय तह रहेको धनुषामा एक गाउँपालिका र एक उपमहानगरपालिका बाहेक हरेक स्थानिय तहले यस संक्रमण कालको समयमा सकेजति आफ्नो तर्फबाट व्यवस्था गरेको हो । धनुषा जिल्लामा अहिले सम्ममा १६ वटा स्थानिय तहमा ३५३ बेड क्षमता भएको क्वारेन्टाइनमा ९३ जना रहेका छन् भने ३२ बेड संख्या भएको आइसोलेशनमा १० जना विरामी रहेको धनुषाका प्रमुख जिल्ला अधिकारी कोषहरि निरौलाले जनाएका छन् । गाउँपालिका र नगरपालिकाले आ-आफ्नो तर्फबाट कोरोनाको शंकास्पद विरामीको लागि क्वारेन्टाइनको व्यवस्था गरेतापनि जनकपुरधाम उपमहानगरपालिका र मुखियापट्टी मुसहरनिया गाउँपालिकाले अहिले सम्म यसको व्यवस्था गरेको छैन् ।
धनुषामा नगराइन नगरपालिकामा ७५ बेड क्षमता रहेको क्वारेन्टाइन सञ्चालनमा रहेको छ भने ३२ बेड क्षमता रहेको आइसोलेशन रहेको छ । त्यस्तै धनुषाधाम नगरपालिकामा ३८, गणेशमान चारनाथ नगरपालिकामा २४, सबैला नगरपालिकामा २५, मिथिला नगरपालिकामा १०, क्षीरेश्वरनाथ नगरपालिकामा ११, विदेह नगरपालिकामा २५, शहिदनगर नगरपालिकामा ३०, कमला नगरपालिकामा १५, मिथिला बिहारी नगरपालिकामा ७, हंसपुर नगरपालिकामा ११, जनकनन्दनी गाउँपालिकामा २०, बटेश्वर गाउँपालिकामा २५, लक्ष्मीनीया गाउँपालिकामा ७, औरही गाउँपालिकामा १६ र धनौजी गाउँपालिकामा १४ बेड क्षमता रहेको क्वारेन्टाइनको निर्माण भएको हो ।
यता जनकपुरधाममै नगरप्रमुखले क्वारेन्टाइनको व्यवस्था नगरेपछि वडा नं. ७ का वडाध्यक्ष जानकी राम साहले आफ्नो वडामा ८ बेड क्षमता भएको क्वारेन्टाइनको निर्माण थालेका छन् ।
जुन अन्तिम चरणमा रहेको उनले जानकारी दिए । यता जनकपुरधाम उपमहानगरपालिकाकी उप प्रमुख रीता कुमारी मिश्रले आफूहरुकै पहलमा गंगुलीमा रहेको मिथिला आयुर्वेद कॉलेजमा क्वारेण्टाइन निर्माण गरिएको दाबी गरिन् ।उनले त्यसका लागि उपमहानगरपालिकाले कर्मचारी समेत खटाएको बताइन् ।
यो विषयमा टिप्पणी गर्नुहोस् !