द सौर्य मिथिला समाचारदाता
जनकपुरधाम, चैत २४ । प्रदेश दुईमा १ सय ३ जनाको कोरोना भाइरसको संक्रमणको शंकामा थ्रोट स्वाब परिक्षण गरिएको छ । स्वाब परिक्षण गरिएकाहरु मध्ये ४० जनाको रिपोर्ट निगेटिभ आएको छ भने ६३ जनाको रिपोर्ट आउन बाँकी छ । आईतबार थप २८ जनाको नमूना संकलन गराए । उनीहरुको रिपोर्ट सोमबार बेलुका वा मंगलबारसम्म आउने बताए । अर्कोतर्फ भारत लगायत अन्य देशबाट फर्केर नेपाल आएका कोरोना भाइरसका शंकास्पद व्यक्तिहरुलाई क्वारेन्टाइनमा राख्ने क्रम समेत जारी रहेको छ । यो संख्या प्रदेश २ मा पनि बढ्दै गएको देखिएको हो । प्रदेश २ मा कोरोना भाइरस संक्रमणको आशंकामा समाचार तयार पार्दासम्म बिभिन्न जिल्लामा निर्माण गरिएको २ हजार ९ सय १८ बेड क्षमताको १ सय ४२ वटा क्वारेन्टाइनमा ८ सय ६५ जना शंकास्पद व्यक्तिलाई राखिएको प्रदेश स्वास्थ्य निर्देशनालयका बरिष्ठ जनस्वास्थ्य प्रशासक विजय झाले जानकारी दिए । प्रदेशभरिमा अहिले १ हजार ८० जना व्यक्तिहरु होम क्वारेन्टाइनमा रहेका छन् भने ८७ वटा आईसोलेशन वार्डमा २७ जनालाई भर्ना गरिएको उनले बताए ।
प्रदेश स्वास्थ्य निर्देशनालयका अनुसार रौतहटमा ६ सय १८ बेड संख्याको १६ वटा क्वारेन्टाइन बनाइएको छ । जहाँ २ सय ५ जनालाई क्वारेन्टाइनमा र २४ जनालाई होम क्वारेन्टाइनमा राखिएको छ भने ९ बेड क्षमताको आईसोलेशन वार्डमा अहिले कुनै शंकास्पद बिरामी नरहेको बताए ।त्यस्तै बारामा ४ सय ४ बेड क्षमताको १४ वटा क्वारेन्टाइनमा अहिलेसम्म ५० जनालाई राखिएको छ । बारा जिल्लास्थित कलैया अस्पतालमा निर्माण गरिएको २० वटा आईसोलेशन बेडमा अहिले ९ जना कोरोनाका शंकास्पद बिरामीलाई राखिएको झाले जानकारी दिए । बारामा अहिले २५ जना होम क्वारेन्टाइनमा रहेका छन् ।
पर्सामा १ सय ९६ बेड क्षमताको १२ वटा क्वारेन्टाइन बनाइएको छ । त्यहाँ ६३ जना क्वारेन्टाइनमा र ५२ जना होम क्वारेन्टाइनमा रहेका छन् । पर्साको वीरगञ्जस्थित नारायणी अस्पतालमा बनाइएको ८ बेडको आईसोलेशन वार्डमा अहिले ५ जना शंकास्पद बिरामीलाई राखिएको छ ।
सप्तरीमा ५ सय ४० बेड क्षमताको ३१ वटा क्वारेन्टाइनमा अहिले २ सय ६४ जनालाई निगरानीमा राखिएको छ भने ५६ जना होम क्वारेन्टाइनमा छन् । राजविराजस्थित गजेन्द्र नारायण सिंह सगरमाथा अस्पतालमा रहेको ९ वटा आईसोलेशन वार्डमा अहिले एकजना शंकास्पद बिरामीलाई भर्ना गरिएको उनले बताए ।
सिरहामा २ सय ४६ बेड क्षमताको १७ वटा क्वारेन्टाइनमा अहिले १ सय २० जना र होम क्वारेन्टाइनमा ७७ जना रहेका छन् । त्यस जिल्लामा १३ बेडको आईसोलेशन रहेकोमा त्यहाँ अहिलेसम्म कुनै पनि शंकास्पद बिरामीलाई राखिएको छैन् । धनुषामा ३ सय २६ बेड क्षमताको १६ वटा क्वारेन्टाइनमा अहिले ८२ जनालाई राखिएको झाले जानकारी दिए । यस जिल्लामा अहिले ४० जनालाई होम क्वारेन्टाइनमा पठाइएको उनले बताए । प्रादेशिक अस्पताल जनकपुरमा १२ बेडको आइशोलेसन रहेकोमा १२ जना शंकास्पद बिरामीलाई आईसोलेशनमा राखिएको छ ।
त्यस्तै महोत्तरीमा ३ सय ७ बेड क्षमताको १६ वटा क्वारेन्टाइन बनाए । त्यहाँ अहिलेसम्म ७ सय ७४ जनालाई होम क्वारेन्टाइनमा पठाइएको छ भने क्वारेन्टाइनमा ५२ जनालाई राखिएको छ । महोत्तरीमा १४ वटा आईसोलेशन वार्ड निर्माण गरिएपनि अहिले ति आईसोलेशनमा कुनैपनि शंकास्पद बिरामी नआएको उनले बताए ।
सर्लाही जिल्लामा २ सय ८१ बेड क्षमताको २० वटा क्वारेन्टाइनमा अहिले २९ जना रहेका छन् भने ३२ जनालाई होम क्वारेन्टाइनमा पठाएको उनले बताए । दुईवटा आईसोलेशन वार्ड निर्माण गरिएपनि अहिले ति आईसोलेशनमा कुनैपनि शंकास्पद बिरामी आएका छैनन् ।यता प्रादेशिक अस्पताल जनकपुरमा रहेको आईसोलेशन बेडमा कोरोनाका शंकास्पद बिरामीहरु बढिरहेकाले बेडको संख्या थप्नुपर्ने आवश्यकता रहेको अस्पतालका मेडिकल सुपरिटेन्डेन्ट डा. नागेन्द्र यादवले बताए ।
यो विषयमा टिप्पणी गर्नुहोस् !