द सौर्य मिथिला समाचारदाता
जनकपुरधाम, चैत २४ । नेपालमा पनि कोरोना संक्रमण बढ्न सक्ने खतरालाई देखेर नेपाल सरकारले देशैभरी लकडाउन लगाएको छ । लकडाउन लगाउन पछाडी कोरोना संक्रमण बढ्न नदिन सामाजिक दुरी कायम गराउनु हो । यसको असर पनि देखिएको छ । यद्यपि यसका साथै कयो स्थानमा लकडाउनको उल्लंघन त भई नै रहेको छ त्यसमाथी सामाजिक दुरीको समेत धज्जी उडाएको पाएको छ ।
जसको प्रत्यक्ष उदाहरण स्वरुप जनकपुरधामस्थित रेल्वे स्टेशनमा लाग्ने हाट बजारलाई लिन सकिन्छ । जनकपुरधाम उपमहानगरपालिका–१ स्थित रेलवे स्टेसन छेउमा हरेक दिन बिहान अझै तरकारी बजार लाग्छ । तरकारी किन्न हुलका हुल मानिस पुग्छन् । प्रहरी त्यहीँ उभिएको हुन्छ । तर लकडाउनको कुनै मापदण्ड पालना गरिँदैन ।
जनकपुरधाम उपमहानगरपालिका वडा नम्बर १का वडाध्यक्ष शत्रुध्न साहले तरकारी बजार व्यवस्थित गर्न प्रयास गरे पनि हालसम्म सफल हुन नसकेको बताए । उनले तरकारी बजारमा दूरी कायम हुन नसकेको स्वीकार गरे । ‘तरकारी जरुरी छ । तर आवश्यक दूरी बनाएर बजार व्यवस्थित गर्नुपर्ने हामीले पनि महसुस गरेका छौं’ साहले भने, ‘प्रहरीलाई भनेका छौं, दूरी कायम गर्न सकिएन भने तरकारी बजार बन्द गरे हुन्छ ।’जनकपुरधाम उपमहानगरपालिका भित्रै बसहिया पनि पर्छ । उपमहानगरभित्रै रहे पनि त्यहाँको परिवेश अझै ग्रामीण छ । बसहियाका अधिकांश स्थानीय लकडाउन र सामाजिक दूरीबारे अनभिज्ञ छन् ।बसहियामा लाग्ने हाटमा सयौं मानिस एकै ठाउँमा जम्मा भएर किनमेल गर्छन् ।
त्यो भीडभाड न त स्थानीय प्रशासनले रोक्न सकेको न जनप्रनिधिले नै लकडाउन पालन गर्न स्थानीयलाई सम्झाउन सकेका छन् ।
बेलाबखतमा प्रहरी पुगेर लकडाउन कार्यान्वयन गराएको जस्तो देखाए पनि कडाई भने गर्न सकेको छैन । चियापसल, हाटबजारमा हुलका हुल मानिस जम्मा हुँदा पनि स्थानीय प्रशासनले कडाइ गर्न नसकेको बसहियाका स्थानीय मनीष कर्ण बताए । सामाजिक दुरी र लकडाउन कार्यान्वयन गराउन जनप्रतिनिधिको भूमिका प्रभावकारी हुन नसकेको उनको भनाइ छ ।
जनकपुरधाम वडा नम्बर २४का वडाध्यक्ष सत्यनारायण साह आफ्नो वडामा लकडाउन कार्यान्वयन हुन नसकेको स्वीकार गर्छन् । ‘हामीले प्रयास गरेका छौं, सम्झाइ बुझाइ गरिरहेका छौं तर कार्यान्वयन हुन सकेको छैन,’ साहले भने, ‘बजार हाटमा भीड रोक्न नसकिए कोरोना संक्रमण जोखिम बढ्ने निश्चित छ ।’कोरोनाको संक्रमण रोक्न सामाजिक दूरी बाहेक अन्य कुनै विकल्प नरहेको चिकित्सकले बताइ रहँदा अझै यसको पूर्ण कार्यान्वयन हुन सकेको छैन् । कोरोना भाइरस संक्रमण जोखिम कम गर्न सरकारले अहिले लकडाउन लागु गरेर सबैलाई घरभित्रै बस्न भनेको छ । तर ग्रामीण भेगमा लकडाउनको खासै वास्ता भएको देखिँदैन ।
यो विषयमा टिप्पणी गर्नुहोस् !