द सौर्य मिथिला समाचारदाता
काठमांडू, चैत २२ गते । सरकारले तीन वटा जिल्लामा र्यापिड टेस्टको प्रक्रिया अगाडि बढाउने भएको छ । शनिबार प्रधानमन्त्री निवास बालुवाटारमा बसेको मन्त्री परिषदको बैठकले कैलाली, कञ्चनपुर र बागलुङमा र्यापिड टेस्टको प्रक्रिया अगाडि बढाउने निर्णय गरेको हो । बैठकले यी तीन जिल्लामा र्यापिड टेस्ट गर्ने र कोभिड १९ पोजिटिभ देखिएमा पीसीआरबाट रिकन्फर्म गर्ने निर्णय गरेको सरकारका प्रवक्ता एवं सञ्चारमन्त्री युवराज खतिवडाले जानकारी दिएका छन् ।
र्यापिड टेस्ट किटको प्रयोग गर्ने बताए पनि चीनबाट ल्याइएका किटहरुको गुणस्तर यकिन भने गरिएको छैन । एन एच आरसीले गुणस्तर जाँच गर्ने भनिए पनि उसले आफूसँग उक्त क्षमता नभएको बताइसकेको छ ।
बैठकले एक प्रदेशबाट अर्को प्रदेशको आवागमन र जिल्ला-जिल्ला आवागमनमा नियन्त्रण गर्ने निर्णय समेत गरेको छ। यसका लागि प्रदेश र स्थानीय सरकारलाई प्रभावकारी ढंगले काम गर्न निर्देशन समेत दिएको छ ।
मन्त्री खतिवडाका अनुसार आजको बैठकमा लकडाउन बढाउने विषयमा निर्णय नभएको भन्दै छिट्टै मन्त्रिपरिषद् बैठक बसेर यसबारेमा निर्णय लिइने बताए । कोरोना भाइरसको जोखिमबाट बच्न भन्दै सरकारले यही चैत २५ गते मध्यरातिसम्म लकडाउन गरेको छ । शनिबारसम्म नेपालमा कोरोनाको संक्रमितको संख्या ९ पुगेको छ । जसमध्ये एक जना निको भएर घर फर्किसकेका छन् । यदि संक्रमितको संख्या बढ्दै गएमा लकडाउन बढाउने तयारीमा सरकार देखिएको छ ।
यो विषयमा टिप्पणी गर्नुहोस् !