द सौर्य मिथिला समाचारदाता
जनकपुरधाम, चैत २१ । कोरोना भाइरसको संक्रमण नियन्त्रणका लागि निति निर्माण गर्ने जिम्मा प्रदेश सरकारले विज्ञहरुलाई दिएको छ । मुख्यमन्त्री लालबाबु राउतको नेतृत्वमा रहेको कोरोना महामारी नियन्त्रण निर्देशक समितिले यो महामारी नियन्त्रणका लागि आवश्यक नीति निर्माण गर्नका लागि सम्बन्धित विज्ञहरुलाई जिम्मा लगाएको हो । कोरोना भाइरससंग सम्बन्धित तथ्यांक प्रदेश दुईमा तथ्यगत नरहेको आवाज उठिरहेको समयमा प्रदेश सरकारले सोही तथ्यांक संकलन तथा निति निर्माणको जिम्मा विज्ञहरुलाई दिइएको बताइएको छ ।
निर्देशक समितिले बिहिबार मात्रै गठन गरेको स्वास्थ्य सल्लाहकार समिति संगको बैठकमा महामारी नियन्त्रणका लागि सरकारले गर्नु पर्ने कार्यहरुको तथ्यगत सूचि सहितको नीति निर्माण गर्ने जिम्मेवारी दिएको थियो । उनले सल्लाहकार समितिलाई सम्बन्धित विज्ञहरु संगको सल्लाहमा नीति बनाएर प्रदेश सरकारलाई यथाशिघ्र उपलब्ध गराउन आग्रह समेत गरेका छन् । विज्ञहरुसंको बैठकमा मुख्यमन्त्रीको नेतृत्वमा रहेको निर्देशक समिति, प्रमुख सचिवको नेतृत्वमा रहेको कार्यकारी समिति र स्वास्थ्य सल्लाहकार समितिका सदस्यहरुको उपस्थिति रहेको थियो ।
सल्लाहकार समितिमा डा. राम केवल साह, डा. सुरेन्द्र यादव, डा. प्रविण मिश्र, डा. काशिकान्त झा, डा. विजय कुमार सिंह, डा. गरिब दास ठाकृुर, डा. जेके लाल रहेका छन् । सल्लाहकार समितिले आजै बाट कार्य प्रारम्भ गरेर यथाशिघ्र आफना सुझावहरु सरकारलाई बुझाउने डा। राम केवल साहले बताए ।
मुख्यमन्त्री राउतले यस अघि कोरोना संक्रमण रोक्नका लागि सुस्त गतिमा कार्य हुँदै आईरहेको स्वीकार गर्दै आउने दिनमा प्रदेश सरकारले द्रुत गतिमा कार्य गर्ने प्रतिबद्धता व्यक्त गरे ।
उनले कोरोना संक्रमण रोक्न प्रदेश सरकारले कुनै किसिमको आर्थिक कमी हुन नदिने बताए । यसका लागि आवश्यक उपकरण तथा एम्बुलेन्स खरिद गर्न प्रदेश सरकार सहयोग गर्न तयार रहेको बताए ।
यो विषयमा टिप्पणी गर्नुहोस् !