द सौर्य मिथिला समाचारदाता
जनकपुरधाम,चैत २० । जनकपुरधामस्थित प्रादेशिक अस्पतालमा विश्वव्यापी रूपमा फैलिएको कोरोना भाइरसको जाँच गर्ने पोर्टेबल आरटी पिसिआर मेसिन जडान अन्तिम चरणमा रहेको छ ।
मेसिन आएको तेस्रो दिन बिहिबार मात्रै जडान कार्य सुरु भएको हो । अस्पतालले बुधबार अपरान्ह ओपीडी भवनको माथिल्लो तल्लामा कोठा उपलब्ध गराएपछि काठमाण्डौंबाट आएका दुईजना प्राविधिक मिलेर सो मेशिन जडान गर्न लागेका हुन् । प्राविधिकहरु सर्वेन्द्र मधुप र विपिन तिमिल्सिनाले पीसीआर मेसिन जडान गर्ने कार्य सुरु गरेका छन् ।
आफूहरुले ठाउँ नै ढिलो पाएकोले मेसिन जडान गर्न ढिलाइ भएको काठमाडौंबाट आएका प्राविधिक टोलीका सदस्य सर्वेन्द्र मधुपले बताए । मधुपका अनुसार आजै बेलुकासम्म मेसिन जडान भई सक्ने बताए । उनका अनुसार जडान कार्य सम्पन्न भए लगत्तै आजै अबेर रातीदेखि कोरोना जाँच कार्य सुरु भईसक्ने छ । उनीहरु केहिदिन यहाँ बसेर अस्पतालका ल्याबका प्राविधिकहरुलाई प्रशिक्षण समेत दिनेछन् ।
संघीय सरकारले चीनबाट ल्याइएको ५ वटा पिसिआर मेसिनमध्ये ४ वटा प्रदेशलाई १-१ वटा वितरण गरेको हो । कोरोना परीक्षणका लागि आवश्यक सो मेसिन प्रदेश २ को जनकपुरधाम, प्रदेश ५ को बुटवल, कर्णाली प्रदेशको सुर्खेत र सुदूरपश्चिम प्रदेशको धनगढीलाई दिइएको छ ।
प्रदेश १ मा यसअघि नै मेसिन जडान भइसकेको छ भने बागमती प्रदेशको शुक्रराज ट्रपिकल हस्पिटलमा चालु अवस्थामा रहेको छ ।
यसअघि कोरोना परीक्षण गर्ने पिसिआर मेसिन नहुँदा प्रदेश २ बाट नमुना संकलन गरी काठमाडौंस्थित शुक्रराज ट्रपिकल हस्पिटल टेकुमा पठाउने गरिएको थियो । प्रादेशिक अस्पताल जनकपुरधाममै पिसीआर मेशिन आएपछि प्रत्येक दिन बढीमा १० वटा जाँच गरि ३ घण्टामै रिपोर्ट आई सक्ने बताइएको छ ।
यो विषयमा टिप्पणी गर्नुहोस् !