द सौर्य मिथिला समाचारदाता
जनकपुरधाम, चैत १९ । प्रदेशमा बढदै गएको अपराधलाई न्युनिकरण गर्न प्रदेश २ सरकारले ल्याएको ‘हेल्लो सिएम’ एप प्रभाव विहिन भएको छ । समुदाय–प्रहरी साझेदारी कार्यक्रमको उद्घाटन गर्दै प्रदेश २ का मुख्यमन्त्री लालबाबु राउतले ‘हेल्लो सिएम’ एप सार्वजनिक गरेका थिए । तर त्यो एप विना कुनै प्रयोग गूगलको प्लेस्टोरबाट हराएको छ । सार्वजनिक भएको केही दिनमै एप प्लेस्टोरबाट हराएको थियो । अहिले प्लेस्टोरमा एउटा ‘हेल्लो सिएम’ देखिएपनि यो एप अन्य प्रदेशको रहेको छ ।
एपलाई लन्च गर्ने समयमा प्रदेश सरकारले यस एपले अपराधलाई न्युनिकरण गर्न ठुलो भूमिका खेल्ने दावा गरेका थिए तर त्यो दावा घोषणामा मात्रै सिमित भएको देखिन्छ । २०७५ साल कार्तिक ११ गते आयोजित समुदाय–प्रहरी साझेदारी सम्बन्धि कार्यक्रममा एप सार्वजनिक गर्दै मुख्यमन्त्री राउतले महिला हिंसा न्यूनिकरणमा यो एपले महत्वपूर्ण भूमिका निर्वाह गर्ने बताएका थिए तर सार्वजनिक भएको केहि दिनमै यो एप प्रयोग विहिन भएको छ ।
महिला हिंसामा परेकोबेला एप डाउनलोड भएको मोबाइल तीनपटक हल्लाए त्यो जानकारी नजिकको प्रहरी कार्यालयमा आकस्मिक कलको रुपमा पुग्ने र पीडितको लोकेसन पनि प्रहरीले थाहा पाउने एप निर्माता इन्जिनियर आदित्य राजले दावी गरेका थिए ।
शहरका विभिन्न संवेदनशील ठाउँमा राखिएको सिसिटिभी क्यामेराले कैद गर्ने दृश्य अनुगमनको लागि प्रहरीसँग आवश्यक संयन्त्र र व्यवस्था छन् । तर हेल्लो सिएम एपका लागि भने त्यस्तो व्यवस्था छैन् । जिल्ला प्रहरी कार्यालय धनुषाका अनुसार महिला हिंसा सम्बन्धि जानकारी फोनमार्फत आउने गरेको भएतापनि हेल्लो सिएम बारे कुनै जानकारी नरहेको बताए ।
यता प्रदेश २ का आन्तरिक मामिला तथा कानून मन्त्री एवं प्रदेश सरकारका प्रवक्ता समेत रहेका ज्ञानेन्द्र कुमार यादवको अनुसार ‘हेल्लो सिएम’ एप पूर्ण रुपले निर्माण नभएकोले अहिले प्रयोगमा आएको छैन् । उनले भने, ‘हेल्लो सिएम एप चाँडै प्रदेश २ को ८ वटै जिल्लमा लन्च गर्छौ ।’
यता एप निर्माता आदित्य राजका अनुसार करिब ६ लाखको आफ्नै लागतमा निर्माण गरेको हेल्लो सिएम एप सरकारले लागु नै गर्न सकेन । आफुले एप निर्माण गरेतापनि प्रदेश सरकारले त्यसलाई सञ्चालनमा नल्याउँदा अहिले प्रयोग विहिन भएको निर्माता राजले बताए । उनका अनुसार प्रदेश सरकारलाई पटक पटक यस एपको सञ्चालनको लागि भन्दा समेत यस प्रति प्रदेश सरकार गम्भिर नरहेको बताए ।
यो विषयमा टिप्पणी गर्नुहोस् !